Wednesday, October 27, 2010

                                             අදිසි සුළඟක්
                                             සමඟ ඉස්සී
                                             පාව ගියමුත්
                                             වරාවක් සේ...
                                             සුළඟ අද මා
                                             හැර ගියාවෙද
                                              වැතිර ඉමි
                                              පරඩැල් පතක් සේ...
                                              අදිසි වූව ඒ
                                              සොදුරු සිසිලට
                                              සිතින් බැඳුණත්
                                               මෙමං කෙලෙසේ...
                                               සුළං පහරට
                                               යළිත් නොඇදෙමි
                                               වැතිර ඉමි
                                               පරඩැල් පතක් සේ...

Wednesday, October 20, 2010

සමුගත් මිතුරු නමට...




සුමිතුර කලෙක නුඹ අප හා සිතින්     බැඳී
හිඳි ඒ දවස් තාමත් මට මතක           ඇතී
විහිදුණු හතර අත මං වල ඇවිද          අපී
වෙන්වී ගියත් මිතුදම විය සිතේ        නිතී...

නුඹ තනි මගෙක කතරක ගිය ගමන            රළු
වැටි වැටි නැගිට ගිය මාවත ගල්             බොරළු
සඳ නැති අමාවක දවසක කළුම                 කළු
වැටුණේ නුඹ,
තවත් නොනැගෙන්නටමයි                     යහළු...

ජීවන මගේ අපමණ දුක් එමට               ඇතී
ඒ දුක් අතර නුඹෙ නමටත් දුකක්           වුණී
සොහොයුර නුඹට දිවියේ සැප අහිමි        වුණී
නොසිතමි,නුඹත් දුක් ගඟකින් එතෙර     වුණී...

Monday, October 11, 2010



ඊයේ,
මැති ඇමති රජගොල්ල
ආදරෙන් තටු මැද්ද
විළඳ මී පැණි බොජුන්
යෙහෙන් රස කර වින්ද
රාජ හංසයා නුඹ...

අද,
ඉහළ ඉගිලේ බියෙන්
තටු කපා කූඩු කළ
කළල් වගුරෙහි ඔබා
පැහැය අවපැහැ ඇන්ද
කාල හංසයා නුඹ...

හෙට,
කළල් වගුරට වැටෙන
වැසි දියෙන් තටු දොවන
දහස් පිරිවර සමඟ
මහත් හරසර ලබන
ධවල හංසයා නුඹ...